ლაშქრობა გურგენიანის ჩანჩქერზე

გურგენიანის (ნინოსხევის) ჩანჩქერი მდებარეობს ლაგოდეხის ეროვნულ პარკში, სადაც შეგიძლიათ ნახოთ ადგილობრივი ფლორისა და ფაუნის იშვიათი ნიმუშები. ეს ეროვნული პარკი პირველი ნაკრძალია საქართველოში, რომელიც დაარსდა 1912 წელს. 40 მეტრიანი გურგენიანის ჩანჩქერი პარკის ერთ-ერთი ულამაზესი ღირსშესანიშნაობაა.

მარშრუტი იწყება გურგენიანის საინფორმაციო ცენტრიდან და ვიწრო ბილიკით მიუყვება მდინარე ნინოხევს. მდინარის ხმა, მცირე წყალვარდნილები უზარმაზარი ქვები და ცივი ნიავი მოხეტიალე ხეობაში, მიმზიდველს და საინტერსოს ხდის სამოგზაურობას. მარშრუტის სიგრძეა 9 კმ. ხეობაში შევხვდებით უამრავ საინტერესო მცენარეს: ლაგოდეხის ნაღველას, ლაგოდეხის თეთრყვავილას, იულიას ფურუსულას, ჯონჯოლს, ლაფანს, წაბლს, ქართულ მუხას და სხვა. ასევე თუ გაგვიმართლებს შეიძლება შველს, ირემს ან გარეულ ღორსაც კი გადავეყაროთ. ლაგოდეხის დაცული ტერიტორიები ამ მხრივ ძალიან მდიდარია.

გურგენიანის ჩანჩქერი 40 მეტრი სიმაღლისაა და ნამდვილად ულამაზეს სანახაობას გვთავაზობს. მსურველებს შეუძლიათ ჩანჩქერის თავზეც კი მოექცნენ და იქედან ადევნონ თვალი როგორ მოსჩქეფს მდინარე ნინოსხევი 40 მეტრიანი კლდიდან. თუმცა ჩანჩქერთან მისასვლელი ბილიკი არც ისე მარტივია გამოუცდელი მოლაშქრეებისათვის. გზად შეიძლება რამდენჯერმე მოგიწიოთ მდინარის გადაკვეთა.

იმისათვის რომ კომფორტულად შეძლოთ ბილიკის გავლა საჭიროა გეცვათ სპორტული ტანსაცმელი და მოქნილი, სპორტული ფეხსაცმელი.