წყალწითელას ხეობა

წყალწითელას ხეობა იმერეთის მხარეში მდებარეობს, ტყიბულისა და თერჯოლის მუნიციპალიტეტებში, გელათის ხიდიდან გოდოგანის ხიდამდე, ზღვის დონიდან 130-200 მეტრზე. იგი კოლხური ტყით დაფარულ ულამაზეს კანიონისებურ ხეობას წარმოადგენს. მდინარე ადიდებისას წითელი მიწის ქანებს რეცხავს, რომლებიც მდინარის გასწვრივაა და წყალი წითელ შეფერილობას იღებს. ხეობას განსაკუთრებულ ხიბლს კულტურულ-ისტორიული ძეგლები სძენს, რომელთა შორისაა გელათის სამონასტრო კომპლექსი და მოწამეთას მონასტერი. მდინარეში მრავლად გვხვდება კალმახი, წვერა, ჭანარი, მურწა, ქაშაპი, ტობი, შამაია და სხვა. მდინარის ნაპირებზე ბინადრობს წავი და ნუტრია. ზამთარში აქ შესაძლებელია წყალმცურავი ფრინველების ნახვა. წყალწითელას ხეობის ბუნების ძეგლი ერთ-ერთი მრავალფეროვანი და საინტერესო ადგილია იმერეთში, რომელიც გამოირჩევა, როგორც ბუნების სილამაზით, ასევე მნიშვნელოვანი კულტურული ძეგლებით.