ჟიბიანის წმინდა გიორგის ეკლესია

ჟიბიანის წმინდა გიორგის ეკლესია სვანეთში, მესტიის მუნიციპალიტეტში, უშგულის თემის სოფელ ჟიბიანში მდებარეობს, უშგულის ლამარიას კომპლექსის სამხრეთ-დასავლეთით. იგი XV საუკუნით თარიღდება. დარბაზული, შირიმით ნაგები ტაძარი სამწახნაგოვანი, შვერილი აფსიდით ბოლოვდება. აფსიდის ცენტრში ერთი მოზრდილი თაღოვანი სარკმელია. კიდევ ერთი სარკმელი დასავლეთ კედელშია გაჭრილი. საკურთხეველი დარბაზისგან კანკელითაა გამიჯნული, რომელსაც ცენტრში თაღოვანი გასასვლელი აქვს, გასასვლელის ორივე მხარეს კი პატარა, თაღოვანი, ხატებისთვის განკუთვნილი ღიობებია. კამარა ორ ვიწრო მონაკვეთად იყოფა ძალიან განიერი, ოდნავ შვერილი საბჯენი თაღით, რომელიც კაპიტელების გარეშე, პირდაპირ გადადის ასეთსავე განიერ, ოდნავ შვერილ პილასტრებში; გრძივ კედლებზე კედლის თაღები გადაყვანილი არ არის. მთელ დარბაზს საკმაოდ მაღალი და ვიწრო ჩამოსაჯდომი საფეხური შემოუყვება. საკურთხევლის შვერილი აფსიდის სამივე წახნაგზე ბრტყელი, განიერ და საკმაოდ ტლანქ "პილასტრებზე" გადაყვანილი, წყობის შეღრმავებით მიღებული თაღია. დასავლეთ კედელზე, სარკმლის თავზე სადა, ტოლმკლავა ჯვრის რელიეფია. ამავე კედელშია ტაძრის ერთადერთი, დაბალი, თაღოვანი შესასვლელი. ნაგებობის თავდაპირველი კარი შემორჩენილი არ არის, ახლა აქ თანამედროვე, ხის, მოჩუქურთმებული კარია. ეკლესია შიგნიდანაც და გარედანაც შებათქაშებულია, იატაკზე ახლად დაგებული მუქი რუხი ქვის ფილებია. წმინდა გიორგის ეკლესიის მშენებელი ცდილობს ლამარიას ეკლესიის ფორმებისა და დეკორის გამეორებას, თუმცა ის ვერ აღწევს ლამარიას დახვეწილობას.