ეთნოგრაფიული მუზეუმი "ბორჯღალო"

ეთნოგრაფიული მუზეუმი “ბორჯღალო” აჭარაში, ქალაქ ბათუმში მდებარეობს, შარაშიძის ქუჩის 14 ნომერში. მუზეუმი 3000 კვ.მ ფართობს მოიცავს და აქ მოწყობილია შესაბამისი ინფრასტრუქტურა, გამწვანება, სავალი ბილიკები და ჩანჩქერიც კი. ეთნოგრაფიულ მუზეუმში წარმოდგენილია აჭარის რეგიონისათვის დამახასიათებელი საცხოვრებელი და სამეურნეო ნაგებობათა მაკეტები, ხალხური რეწვის დარგები, აგრარული მეურნეობა, ყოფითი ცხოვრება და სხვა, ამ ყველაფერს კი ფოლკლორული მუსიკის თანხლებით დაათვალიერებთ. აქ ნახავთ ადამიანთა ფიგურებს სხვადასხვა საქმიანობისას. შრომითი პროცესები ასახულია დარგების შესაბამისად ჩაცმული მანეკენებით, სამუშაო გარემოთი და იარაღ-ინვენტარით. მუზეუმში წარმოდგენილი თითოეული, მაკეტი, ფიგურა თუ ხეზე კვეთილობის ნიმუში შექმნილია “ბორჯღალოს” დამფუძნებლის - ქემალ თურმანიძის მიერ. ეთნოგრაფიული მუზეუმი “ბორჯღალო” ბათუმის ერთ-ერთი ღირსშესანიშნაობაა და ის ძალიან საინტერესო ადგილია აჭარის ფოლკლორის, ყოფა-ცხოვრებისა და კულტურული თავისებურებების გასაცნობად. აქ შეგიძლიათ მოიწყოთ შემეცნებითი დღე და ამავდროულად განიტვირთოთ ლამაზ, სასიამოვნო გარემოში.