ღვინის აღმართი (სირაჯხანა)

ღვინის აღმართი (სირაჯხანა) თბილისის ერთ-ერთი ძველი ქუჩაა. აღმართი მტკვრის მარცხენა ნაპირზე, მეტეხის ხიდთან იწყება. ამ პატარა, ქვებით მოკირწყლულ ქუჩას დიდი ისტორია აქვს და სილამაზითაც გამოირჩევა. ღვინის აღმართიდან მეტეხის ეკლესიისა და ნარიყალას ციხე-სიმაგრის შესანიშნავი ხედებით დატკბებით. აქვეა განვითარებული შუასაუკუნეების დარეჯან დედოფლის სასახლეც, რომელიც ლამაზი და საინტერესო არქიტექტურით მეტ მომხიბვლელობას სძენს ამ ადგილს. ღვინის აღმართის პირველ ნომერში ისტორიული სადარბაზო მდებარეობს, სადაც XX საუკუნის თბილისური სადარბაზოებისთვის დამახასიათებელი მხატვრობაა შემორჩენილი. სადარბაზოს კედლებზე გამოსახულია ამურები და ანგელოზები, გამოყენებულია ოქროს იმიტირებული საღებავები. ქუჩაზე ასევე არის კარაოკე ბარი, კაფე და რესტორანი, სადაც დროის სასიამოვნოდ გატარებას შეძლებთ.
ღვინის აღმართზე ღვინითა და არყით მოვაჭრეთა დუქნების რიგები იყო განლაგებული. ადრე განარჩევდნენ პატარა და დიდ სირაჯხანას. პატარა სირაჯხანა თათრის მოედნის სიახლოვეს მდებარეობდა. შემდგომში ეს ქუჩა შუაბაზრის (დღევანდელი ლესელიძის ქუჩა) რეკონსტრუქციისას გაქრა და ამ ადგილზე ახლა სკვერია. დიდი სირაჯხანა კი მტკვრის მარცხენა ნაპირზე გრძელ მოხვეულ აღმართს გასდევდა, რომელიც მეტეხის ხიდთან იწყებოდა და ავლაბრის გალავნის ქვემოთ კლდის ძირს მიუყვებოდა. აქ განლაგებული დუქნები და სარდაფები მარაგდებოდა კახეთიდან ურმებით ჩამოტანილი ღვინით. აქვე იყო ძველი თბილისის უმთავრესი ღვინის ბაზარი და ქალაქის ბოჰემური ცხოვრების ერთ-ერთი ცენტრი.