ტაბაწყურის თეთრი ეკლესია

ტაბაწყურის თეთრი საყდარი სამცხე-ჯავახეთის მხარეში, ბორჯომის მუნიციპალიტეტში, სოფელ ტაბაწყურში, ნახევარკუნძულის ცენტრში მდებარეობს. იგი 1843 წელს აგებული სომხური ეკლესიაა. მისი სახელწოდება პასპორტში მოხსენებულია როგორც „სურბ კარაპეტი“. ძეგლი დარბაზული ტიპის განიერ შენობას წარმოადგენს, რომელიც აღმოსავლეთით იატაკის დონიდან ხუთი საფეხურით ამაღლებული საკურთხევლით სრულდება. საკურთხევლის ორივე მხარეს მოთავსებულია სიმეტრიულად განლაგებული პასტოფორიუმები. ტაძრის ფასადები, გარდა დასავლეთის ფასადისა, შელესილია. ნაგებია სხვადასხვა ფერის ფლეთილი ტუფისგან, ალაგ-ალაგ გამოყენებულია აგურიც. ეკლესიას დასავლეთის მხრიდან აქვს შესასვლელი, რომელიც თაღოვანი პორტალითაა გაფორმებული. დასავლეთის ფასადის ჩრდილოეთ ნახევარს ზედ მიშენებული კლუბის კედელი ფარავს. სამხრეთის, ჩრდილოეთის და აღმოსავლეთის კედლებში სამ-სამი სარკმელია. დასავლეთ ფასადის ფრონტონის ცენტრში სამრეკლოს ფანჩატურია აღმართული. ინტერიერი სახეცვლილი და შეთეთრებულია. ტაძარს მარტივი, თაროს ფორმის ქვის კარნიზი შემოუყვება. გადახურულია შიფრით. 
სოფელში ასევე შეგიძლიათ ნახოთ X საუკუნის ქართული ხუროთმოძღვრების ერთ-ერთი მნიშვნელოვანი ძეგლი, ტაბაწყურის წითელი ეკლესია. 

როგორ მივიდეთ

ტაბაწყური ბორჯომიდან 60 კმ-ით არის დაშორებული. აქ მოხვედრა  2 მხრიდანაა შესაძლებელი, ახალქალაქიდან და ბაკურიანიდან. ბაკურიანს გასცდებით თუ არა გრუნტის გზა იწყება, რომელელზეც გადაადგილება სედანით არის შესაძლებელი, თუმცა საჭიროა სიფრთხილე. ზამთრის და ადრეული გაზაფხულის პერიოდში ბაკურიანის მხრიდან ტაბაწყურში მანქანით მისვლა შეუძლებელია,  გზა იკეტება. ახალქალაქის მხრიდანაც გზის ბოლო მონაკვეთი გრუნტიანია და აქაც სედანით შეიძლება გადაადგილება. ზამთარში ხმოლოდ ახალქალაქის მხრიდან არის შესაძლებელი ტაბაწყურში მოხვედრა.