ქუთაისის საერთაშორისო აეროპორტი

ქუთაისის საერთაშორისო აეროპორტი, ასევე დავით აღმაშენებლის სახელობის საერთაშორისო აეროპორტი ან კოპიტნარი - მდებაორებს ქალაქ ქუთაისიდან 14 კილომეტრით დასავლეთით, თბილისიდან 200 კილომეტრში, ბათუმიდან 120 კილომეტრში.

ის ერთ-ერთია საქართველოს სამ საერთაშორისო აეროპორტს შორის, თბილისის საერთაშორისო აეროპორტისა და ბათუმის საერთაშორისო აეროპორტთან ერთად. ასაფრენი ბილიკის სიგრძე 2 600 მეტრს შეადგენს და სრულიად აკმაყოფილებს თანამედროვე სტანდარტებს. აეროპორტს ამ ეტაპზე, ერთდროულად 600 მგზავრის მომსახურება შეუძლია.

აეროპორტი განახლდა 2012 წელს და არის რეგიონში ერთადერთი საერთაშორისო აეროპორტი, რომელიც მომხმარებლებს სთავაზობს დაბალბიუჯეტიანი ავიაკომპანიების მომსახურებას.

ქუთაისის აეროპორტს საკვანძო მნიშვნელობა აქვს. 300 კმ. რადიუსით უკავშირდება თურქეთს, სომხეთს, აზერბაიჯანსა და რუსეთს. ხელსაყრელი კლიმატური პირობების და ინფრასტრუქტურის წყალობით, ქუთაისის აეროპორტი სათადარიგო მნიშვნელობისაა - აქ ნებისმიერი ამინდის და ხილვადობის პირობებში შესაძლებელია რეისის მართვა.

აეროპორტში როგორც ჩამოფრენის ასევე გაფრენის დარბაზებში ფუნქციონირეობს კაფეტერია.

ტრანსპორტი აეროპორტში

ავტობუსი - ქუთაისის აეროპორტის მგზავრთა სატრანსპორტო გადაყვანას საქართველოს სამი ძირითადი ქალაქის (თბილისი, ქუთაისი, ბათუმი) მიმართულებით, ავტობუსებით/მიკროავტობუსებით ახორციელებს ორი კომპანია - Georgian Bus და Omnibus Express .

ტრანსპორტირების განრიგი აეროპორტის მიმართულებით და პირიქით, მორგებულია ქუთაისის საერთაშორისო აეროპორტის ავიარეისების განრიგზე.

ტაქსი - აეროპორტის ტერმინალის შენობის გასასვლელთან არის A2B/“Georgian Bus“-ის ტაქსის სადგომი.

ავტოსადგომი

ქუთაისის საერთაშორისო აეროპორტი მომხმარებლებს სთავაზობს 24/7 პარკინგის მომსახურებას: ავტოსადგომი მოიცავს 124 ავტომობილის სადგომს, მათ შორის შეზღუდული შესაძლებლობის პირთათვის გამოყოფილ სპეციალურ ადგილებს.

პარკინგის ღირებულება არის 1 ლარი/სთ, ხოლო 7-დან 24 საათამდე პარკირების შემთხვევაში 7 ლარი.