ევროპის მოედანი

ევროპის მოედანი რიყის სამრეთ ნაწილში, მეტეხისა და ღვინის აღმართებს, ნოე ჟორდანიას სანაპიროსა და მეტეხის ხიდს შორის მდებარეობს. მოედანზე ქართველი საზოგადო მოღვაწისა და ქართული კონიაკის წარმოების დამფუძნებლის - დავით სარაჯიშვილის ძეგლი დგას. ევროპის მოედანთან მდებარეობს თბილისის ისეთი პოპულარული ღირსშესანიშნაობები, როგორიცაა: მეტეხის ტაძარი და დარეჯანის სასახლე. აქ ძველი თბილისის სახასიათო არქიტექტურასა და ისტორიულ, ულამაზესი მხატვრობით გამორჩეულ სადარბაზოსაც მოინახულებთ. აქვეა თანამედროვე არქიტექტურის ნიმუში - მშვიდობის ხიდი და რიყის პარკი, სადაც დასვენებას, გართობასა და ნარიყალაზე საბაგიროთი ასვლასაც შეძლებთ. თუკი მეტეხის ხიდს გადაივლით მეიდანზე მოხვდებით და აბანოთუბნის, ცისფერი მეჩეთისა და ძველი თბილისის სხვა ღირსშესანიშნაობების მონახულების საშუალება გექნებათ. ახლოს არის ასევე თბილისის ისტორიის მუზეუმი (ქარვასლა), სადაც არქეოლოგიური, ეთნოლოგიური, დოკუმენტური მასალა, უმდიდრესი ფოტოკოლექცია, ხალხური, გამოყენებითი და სახვითი ხელოვნების ნიმუშებია დაცული. ევროპის მოედნის გარშემო მრავლადაა კაფე-ბარები, რესტორნები და სასტუმროებიც, სადაც სასიამოვნოდ გაატერბთ დროს და დააგემოვნებთ ქართულ სამზარეულოს. თბილისის შესანიშნავი ხედები, ფერადი ხალიჩები თუ მოჩუქურთმებული აივნები ძალიან მიმზიდველს ხდის მოედნის მიმდებარე ტერიტორიას, ამიტომაც აქ ყოველთვის ხალხმრავლობაა. ევროპის მოედანსა და მასთან მდებარე პატარა მოკირწყლულ ქუჩებს ხშირად სტუმრობენ როგორც ტურისტები, ასევე ადგილობრივები ფოტოების გადასაღებად, ახალი საინტერესო ადგილების აღმოსაჩენად, ან უბრალოდ სახეტიალოდ.