სამტრედია

სამტრედიის შესახებ

სამტრედია იმერეთში მდებარე მუნიციპალიტეტია. ეს ადგილი მოხსენიებულია ძველ ისტორიულ წყაროებშიც XVIII საუკუნის II ნახევრიდან, როგორც სოფელი სამტრედია. 1872 წლიდან კი, მას შემდეგ რაც ფოთი-თბილისის სარკინიგზო ხაზი ამოქმედდა, იგი უკვე დაბა სამტრედიის სახელით იხსენიება. ოდესღაც რაიონის ჭალა ჭაობიან ტყეს წარმოადგენდა, ჰავა იმდენად ცუდი იყო, რომ ამ ადგილებში დასახლებას ყველა ერიდებოდა. რკინიგზის მშენებლობამ კი ხელი შეუწყო სამტრედიის განვითარებას, ჭაობები დააშრეს, ტყე გამინდვრეს და ჰავა გაუმჯობესდა. მისი დაბა-ქალაქად გარდაქმნა 1999 წელს დასრულდა, როცა განსაკუთრებით გაიზარდა მრეწველობა. რაიონის ტერიტორია ადრე კოლხეთის, ეგრისის, ხოლო შემდეგ ეგრის-აფხაზეთის სამეფოსა და საქართველოს გაერთიანებულ სახელმწიფოში ერთიანდებოდა. სამტრედია ლამაზი რაიონია, სადაც მრავალ საინტერესო კულტურულ ძეგლს ვხვდებით. განსაკუთრებით აღსანიშნავია: ვაზისუბნის ღვთისმშობლის სახელობის ეკლესია, ტელეფისის XI-XII საუკუნეების ციხის ნანგრევები, გამოჩინებულის წმ. გიორგის სახელობის ეკლესია, ჯიქთუბნის ეკლესია და ა.შ. რაიონში არის ბიბლიოთეკა, კულტურის სახლი, სამხატვრო გალერეა და ნიკო ნიკოლაძის სახლ-მუზეუმი. მუნიციპალიტეტს აქვს ერთი ადგილობრივი გაზეთი, „სამტრედიის მაცნე“.

გეოგრაფია და კლიმატი

სამტრედიის მუნიციპალიტეტი დასავლეთ საქართველოში, იმერეთის მხარეში მდებარეობს, მდინარე რიონის მარჯვენა სანაპიროზე, იქ სადაც ქუთაისიდან მომავალ გზატკეცილს უერთდება გურიისა და სამეგრელოს მთავარი გზები. მისი ადმინისტრაციული ცენტრია ქალაქი სამტრედია. მუნიციპალიტეტი მოიცავს შემდეგ ადმინისტრაციულ ერთეულებს: ქალაქი სამტრედია, დაბა კულაში, ბაში, გამოჩინებული, გომი, გორმაღალი, ეწერი, მელაური, ნაბაკევი, ეფეთი, საჯავახო, ტოლები, ღანირი, იანეთი, დიდი ჯიხაიში. რაიონს ესაზღვრება აბაშის, ლანჩხუთის, ვანის, ხონის, წყალტუბოს და ჩოხატაურის მუნიციპალიტეტები. სამტრედიის მუნიციპალიტეტის ძირითადი ნაწილი კოლხეთის დაბლობზეა განლაგებული, ხოლო მცირე ნაწილი საჯავახოს ზეგანზეა შეფენილი. რაიონის მთავარი მდინარეა რიონი, რომელიც მას ორ თითქმის თანაბარ ნაწილად ჰყოფს.
სამტრედიის მუნიციპალიტეტი ნოტიო სუბტროპიკული ჰავის ზონაშია. ჰაერის საშუალო წლიური ტემპერატურა 14°C -ია. იანვრის საშუალო ტემპერატურა +5°C-ია, ხოლო ყველაზე ცხელი თვის, ივლისისა კი - +25°C.